Li ser Hevşaredarê Tetwanê Mumîn Erol Lêpirsîna “Êrişa li ser Rojnameger” hat Destpêkirin
🔴Serdozgeriya Komarê ya Tetwanê, derbarê Hevşaredarê Tetwanê yê DEM Partiyê Mumîn Erol de bi îdiaya “henase, gef û êrişa fîzîkî” ya li dijî rojnameger Mucahît Tarlan, lêpirsîn da destpêkirin. Hat ragihandin ku DEM Partiyê jî ji ber vê bûyerê cezayê “şermezarkirinê” daye Erol.
Li navçeya Tetwana Bedlîsê, nîqaşa di navbera Hevşaredar Mumîn Erol û rojnameger Mucahit Tarlan de derbasî qada darazê bû. Cemiyeta Rojnamegerên Bilîsê bi daxuyaniyeke nivîskî êrişa li ser hevkarê xwe şermezar kir û diyar kir ku ew ê şopdarê pêvajoya hiqûqî bin. Di daxuyaniyê de hat gotin:
“Ji bo derketina rastiya bûyerên wekî heqaret, gef û êrişa fîzîkî ya ku di navbera Şaredarê Tetwanê Parêzer Mumîn Erol û hevkarê me Mucahît Tarlan de qewimîne, ji aliyê Serdozgeriya Komarê ya Tetwanê ve lêpirsîn hat destpêkirin.”
Li gorî îdiayan, nîqaş piştî ku rojnameger Mücahit Tarlan xebatên şaredariyê yên paqijkirina berfê rexne kir, dest pê kir. Hat ragihandin ku di meha Çileyê de, DEM Partiyê ji ber gotinên zayendperest û gefên li dijî Tarlan, derbarê Erol de pêvajoya dîsîplînê dabû destpêkirin û di encamê de cezayê şermezarkirinê dabûyê.
Rojnameger Tarlan, bi hinceta ku rastî heqaret, gef û êrişa fîzîkî hatiye, giliyê Erol kiribû. Tê payîn ku di rojên pêş de dozgerî îfadeyên her du aliyan bigire.
Her wiha Komeleya Rojnamegerên Dîcle Firatê (DFG) jî bertek nîşanî bûyerê da û di daxuyaniya xwe de got: “Em Hevşaredarê Tetwanê Mumîn Erol ê ku ji ber rexneyên li ser xebatên şaredariyê heqaretên zayendperest û gef li Mucahît Tarlan xwariye şermezar dikin.”
/Çavkanî: MA/
