🔴Parlamentera DEM Partiyê ya Dersîmê Ayten Kordu, di derbarê hilweşandina bingeha Cemxaneyê ya li gundê Şawukanê û dûrxistina serokê komeleya gund ji wezîfeyê, bertekeke tund nîşan da û bang li rayedaran kir.
Li taxa Şawûkan (Yuvali)) a navçeya Xirabşarê ya Meletiyê, welatiyên Elewî ji bo daxwazên xwe yên baweriyê bi cih bînin û şînên xwe birêve bibin, bi derfet û keda xwe dest bi avakirina Cemxaneyê kiribûn. Lê belê, tevî ku pêvajoya hiqûqî ya veqetandina erdî berdewam dikir, bingeha Cemxaneyê ji aliyê Midûriyeta Daristanê ve hat hilweşandin.
‘Wicdanê Civakî Birîndar Bû’
Parlamenter Ayten Kordu, li ser hesabê xwe yê medya civakî (X) daxuyaniyek belav kir û bal kişand ser vê neheqiyê. Kordu diyar kir ku ev hilweşandin ne tenê operasyoneke teknîkî ye, di heman demê de li dijî wicdana civakî ye.
Kordu di daxuyaniya xwe de ev xal destnîşan kirin:
• Hilweşandina Bingeha Cemxaneyê: Bêyî ku li benda encama hiqûqî bisekinin, keda gundiyan hat tunekirin.
• Dûrxistina Serokê Komeleyê: Serokê Komeleya Gund Ferhat Boztepe, ji ber ku li dijî vê neheqiyê derketiye, ji wezîfeyê hat dûrxistin. Kordu vê yekê wekî “destdanîna ser vîna gel” û “cezakirina gundiyan” pênase kir.
Bang li Wezareta Navxweyî û ya Çandiniyê Kir
Kordu di peyama xwe de Wezareta Çandiniyê û Daristanê û Wezareta Karên Navxweyî etîket kirin û daxwaz kir ku demildest dev ji vê biryara hiqûqî berdin:
“Em li cem gelê Şawûkan (Yuvali) ne. Divê ev biryara bêhiqûqî ya derbarê Serokê Komeleyê de bê betalkirin. Em ê şopdarê vê pêvajoyê bin.”
Ev bûyer li herêmê wekî binpêkirina azadiya baweriyê û zexta li ser saziyên sivîl tê nirxandin.
/Nûpel/
