🔴Helbestvan û nivîskarê navdar ê Kurd Refîq Sabir, ku bi helbesta xwe ya bi nav û deng a ji bo Komkujiya Helebceyê “Be Tenya Cêm Mehêllin” (Min bi tenê nehêlin) di bîra gel de cih girtibû, li Swêdê koça dawî kir.
Refîq Sabir ku yek ji navên herî girîng ên edebiyata Kurdî bû û xwediyê gelek berhemên hêja bû, nûçeya wefata wî dilê her kesî êşand. Şairê navdar ê ji Qeladzêya Silêmaniyê, ku ji salên 1980’yî û vir ve li Swêdê dijiya, çavên xwe li jiyanê girtin. Sabir, bi taybetî bi helbesta xwe ya ku ji bo qurbaniyên kîmyabarana Helebceyê nivîsandibû, di dilê Kurdan de şuneke taybet girtibû.
Jiyaneke ji Siyasetê Heya Edebiyatê
Sabir, ji bilî jêhatiya xwe ya edebî, di dema borî de di qada siyasetê de jî aktîf bû. Demekê di nava refên Partiya Komunîst a Iraqê de xebatên siyasî meşandin. Piştî Raperîna Mezin a sala 1991’ê, ew ji partiyê veqetiya û piştî demekê bi temamî ji siyaseta aktîf dûr ket û xwe da ser edebiyatê.
Serokê Herêma Kurdistanê Nêçîrvan Barzanî Piştgiriya Dermankirinê Pêşkêş Kiribû
Nêzîkî mehek berê dema ku nexweşiya Refîq Sabir giran bûbû, Şêwirmendê Serokê Herêma Kurdistanê Zîrek Kemal bi telefonê bi wî re axivîbû. Kemal peyama Serok Nêçîrvan Barzanî ya “derbasbûna herî baş” gihandibûyê û ragihandibû ku Serok Barzanî ji bo pêvajoya dermankirinê amadeyê her cure alîkarî û piştgiriyê ye. Helbestvan û nivîskarê Kurd Sabir jî ji ber vê nêzikatiya dilovanî spasiyên xwe pêşkêşî Serokê Herêma Kurdistanê kiribûn.
/Çavkanî: Rûdaw/
