🔴Wezîrê Parastina DYA Pete Hegseth, li Pentagonê derbarê herikîna operasyona li ser Îranê daxuyanî dan. Hegseth got: “Kabiliyetên Îranê her saet hildiweşin. Em ê di nav hefteyekê de li asîmanê Îranê kontrola tam peyda bikin.”
Operasyona “Epic Fury” (Xezeba Destanî) ya ku Îsraîl û DYA’yê di 28’ê Sibatê de li dijî Îranê dabûn destpêkirin ket roja xwe ya pêncan. Ji Pentagonê peyamên ku dê şer girantir bibe hatin dayîn.
Wezîrê Parastina DYA Pete Hegseth civîneke çapemeniyê li dar xist û bal kişand ser doktrîna navdar a “Shock and Awe” (Şok û Dehşet) ku di sala 2003’an de di dema dagirkirina Iraqê de hatibû bikaranîn. Hegseth destnîşan kir ku operasyona Îranê di asteke pir mezintir de ye.
Hegseth wiha axivî: “Niha em du qatê hêza hewayî ya ku li Iraqê hatibû bikaranîn bi kar tînin û em kampanyayê hîn bileztir dikin. Ev tenê destpêk e; em hêdî nabin, berevajî em leza xwe zêde dikin. Îro balafirên bombebaranê û yên şer hîn bêtir digihêjin herêmê.”
“Mîmarê plana sûîqesta Trump hat kuştin”
Hegseth derbarê encamên îstîxbarî yên operasyonê de agahiyeke girîng parve kir û got:
“Rêberê yekîneya Îranî ya ku mîmarê plana sûîqesta li dijî Serok Trump bû, di êrîşan de hat kuştin. Îranê hewl da Serok Trump bikuje, lê kenê dawî yê Serok Trump bû.”
Herwiha Wezîr piştrast kir ku piştî mirina Rêberê Olî Elî Xameneyî, avahiyên konseya demkî ya ku hatibû avakirin rasterast bûne armanc û xetên parastinê yên li dora tesîsên nukleerî bi mûşekên bi lazer hatine rûxandin.
“Hêza deryayî ya Îranê êdî bêbandor e”
Hegseth diyar kir ku hêza deryayî ya Îranê bi temamî felç bûye û derbarê operasyonên li Okyanûsa Hindî de agahî dan. Hegseth behsa keştiya Îranê ya ku li nêzî Sri Lankayê hatibû binavkirin kir û got: “Hêzên Deryayî yên Îranê êdî ji aliyê operasyonel ve ne xwedî tu girîngiyekê ne. Em li pişt binavkirina keştiya şer a Îranê ya li Okyanûsa Hindî bûn. Em gefên li deryayan yek bi yek paqij dikin.”
Mûşekên bi lazer tên bikaranîn
Wezîrê Parastinê hişyarî da ku di rojên pêş de pêlên êrîşê yên hîn mezintir di rê de ne û wiha got: “Em ê bikaranîna mûşekên bi lazer bidomînin. Di kêmtirî hefteyekê de, du hêzên hewayî yên herî bi hêz ên cîhanê (DYA û Îsraîl), dê li asîmanê Îranê kontroleke bêrîber peyda bikin. Rampa firlatandinê û depoyên cebilxaneyê yên Îranê diqedin.”
“Îranê bi niyeta xerab muzakere kir”
Tevî ku DYA û Îsraîl aliyê ku êrîş dane destpêkirin in jî, Hegseth rêveberiya Tehranê bi meşandina “dîplomasiya bi niyeta xerab” tawanbar kir.
Hegseth îdia kir ku Îranê maseya muzakereyê ji bo bidestxistina demê û amadekariya êrîşê bikar aniye; wî hevkarê xwe Îsraîl jî wekî “şirîkekî xwedî şiyanên bêhempa û nehejiya” pênase kir.
Di dema ku nîqaşên li ser lêçûna aborî û siyasî ya şer di nav DYA’yê de berdewam dikin, Hegseth peyama ku operasyon dê heta gihîştina armancên dawî bidome da û got: “Hêza Amerîkayê dê ji her demê tundtir û biaqiltir li qadê serdestiya xwe bidomîne.”
/Çavkanî: Rûdaw/
