🔴AMED – Di hefteyeke krîtîk a Lîg1’ê de, Amedspor di “Derbiya Bakur” de li qada xwe pêşwaziya Wansporê kir. Amedsporê bi lîstikeke serdest û bi gola di deqeyên dawî de, lîstik 1-0 qezenc kir û 3 puanên zêrîn nivîsandin ser navê xwe.
Di Dewreya Yekem de Şerê Kontrolê
Maç bi coşeke mezin a alîgiran dest pê kir. Amedsporê ji deqeyên destpêkê ve kontrola lîstikê girt destê xwe û zextê bir ser kela Wansporê. Tîma mêvan Wansporê, li dijî êrişên Amedsporê zêdetir bi pergala parastinê bersiv da. Her çend her du tîman di nîveka yekem de derfetên golê bi dest xistin jî, tîm bi encama 0-0 çûn bêhnvedanê.
Di Deqeya 65’an de Peyama Biratiyê
Nîveka duyem bi tempoyeke bilindtir berdewam kir. Di deqeya 65’an de, ku nîşaneya plakaya bajarê Wanê ye, li Stadyuma Tahîr Elçî dîmenên balkêş derketin holê. Hemû alîgiran flaşên telefonên xwe vêxistin û bi yek dengî dirûşmên piştgiriyê ji bo Wansporê berz kirin. Ev helwesta centîlmenî, ji encama maçê zêdetir mohra xwe li rojê xist.
Gola Serkeftinê di 90+3’an de Hat
Di deqeyên dawî de zexta Amedsporê zêde bû. Di deqeya 75’an de şûta Moreno ji stûnê vegeriya, lê Amedsporê dev ji êrişên xwe berneda. Di deqeya 90+3’an de, Felix Afena-Gyan bi goleke bi qîmet tîma xwe 1-0 xist pêşiyê. Maç bi vê encamê bi dawî bû.
Rewşa Puanan û Hêviyên Şampiyoniyê
Bi vê serkeftinê:
• Amedspor puanên xwe derxist 54’an û hêviyên xwe yên şampiyoniyê bi hêztir kir.
• Wanspor di 38 puanî de ma û şansê xwe yê Play-Offê ji bo hefteyên pêş re hişt.
Di dawiya maçê de peyama herî girîng “biratî” bû. Alîgirên her du tîman nîşan dan ku spor beriya her tiştî qada dostanî û centîlmeniyê ye.
/Nûpel/
