🔴Wezîrê Derve yê Iraqê Fûad Husên ragihand ku ew ê rê nedin axa Iraq û Herêma Kurdistanê ji bo êrişên ser welatên cîran û bi taybetî jî Komara Îslamî ya Îranê bê bikaranîn.
Wezîr Husên ev nirxandin îro (Pêncşem, 5’ê Adarê) di dema pêşwazîkirina Balyoza Hollandayê ya li Iraqê Janet Alberda de li paytext Bexdayê anîn ziman. Li gorî daxuyaniya nivîskî ya Wezareta Derve ya Iraqê, di hevdîtinê de rageşiya ku li herêmê her diçe zêde dibe û polîtîkayên ewlehiyê yên Iraqê hatin gotûbêjkirin.
“Helwesta Hewlêrê zelal e”
Husên di hevdîtinê de bal kişand ser wê yekê ku divê axa Iraqê wekî “sengerê êrişê” li dijî welatên cîran neyê bikaranîn û helwesta zelal a Hikûmeta Herêma Kurdistanê di vê mijarê de gihand balyoza Hollandayê.
Wezîr Husên careke din dubare kir ku rêveberiya Hewlêrê bi ti awayî rê nade ku sînorên Herêma Kurdistanê bi şêweyekî ku bibe gef li ser ti welatekî cîran, bi taybetî jî Komara Îslamî ya Îranê, bêne bikaranîn.
Her wiha Husên di civînê de tekezî li ser biryardariya hikûmeta Iraqê ya ji bo parastina ewlehiya canî ya hemû nûneratiyên dîplomatîk û dîplomatên biyanî yên li welat kir.
Di bin siha krîza herêmî de
Ev tekezîkirina Wezîrê Derve yê Iraqê ya li ser “êrişên ser welatên cîran” û “ewlehiya nûneratiyên dîplomatîk”, di atmosfera germ a şerê ku di 28’ê Sibata 2026’an de di navbera DYA, Îsraîl û Îranê de dest pê kir û tevahiya Rojhilata Navîn hejand de hat. Rêveberiyên Bexda û Hewlêrê ji bo ku şer û pevçûn derbasî axa Iraqê nebin, trafîkeke dijwar a dîplomasiyê dimeşînin.
/Çavkanî: Rd/
