Munaqeşeyê ki verê ney çend heftey bi qerarê Meclîsê Beledîyeyê Dersîmî avahîyê xizmet ê beledîyey di virnayena nameyê ”Tunceli” û bikarardena nameyo qedîm Dersîm dest pa kerdî, dirîyayeya him dewleta Tirkîyey, him jî partîyê ki îdeolojîya resmî parêzenê fina bol akerde mûsna. Hetta taynî kesê ki civerê HDP waştîbê ki Fatih Mehmet Maçoglu qezenc bikero jî dest bi rexneyê xu yê tûjî kerdî. Ê bi ”komunîst”eya Maçoglu ”razî” bî, labirê no qerar ”etnîkî” bi goreyê înan.
Bi waştena walîyê ”Tunceli”, Mahkemeya Îdarî ya Erzinganî hema no qerarê meclîsê Dersimî da bi vindarnayen û Wezaretê Zerî jî mufetîşê xû riştî Dersim û tehqîqat dest pa kerd. Pers hewna germ a û dewlet û yê ki îdeolojîyê resmî parêzenê êdî heme çî bikerê û nêverdê nameyê Dersîmî resmî bîro qebûlkerden.
Zey yeno zanayeni, na persi newe nîya û tim bi kiştêna aktuel bîya. Ma munaqeşeyê bol kahanî bibê kişti, 2009in di parlamenterê BDP yê Dersîmî Şerafettin Halisî meclîs di pêşnîyarê dabi ki nameyê Dersîmî bêro qebûlkerden. 2010in di jî Meclîsê Wîlayeta Dersîmî bi reyanê BDP, CHP û EMEPa qerar da bi ki nameyê sukî bibo Dersîm. 2011in di kombiyayenêna partîya xu di serokwezîrê ey wextî Erdoganî rexneyê tûjî ardîbî CHP sero. Qandê ki qetlîamê Dersîmî wextê hukûmatê CHP di bîyê, vatê ki gereg CHP û serekê ci yo Dersîmij Kiliçdaroglu uzir biwazo.
Hetta winî verî şi ki vat: “Eger o do bi nameyê dewleta uzir bîro waşteni, eger edetêno wina esto, ez uzir wazena”. Bahdê ney jî partîya Erdoganî ra taynî kesa waştî ki meclîs di tehqîqat bîro destpakerden. 2013yin di jî parlamenterê CHP ê Dersîmî Huseyin Aygunî pêşnîyar berdbi meclîs û waşt bi ki nameyê Dersîmî bîro qebûlkerden.
Labirê nê heme çi jî nêşî sere û Erdoganî bixu bi desan sûkanê ma di çiyo ki amebi serê Dersîmê ma bi taynî kiştana fina ard serê ma. Zekî o Erdogano ki dersê demokrasî dayê CHP û Kiliçdaroglu şiro, kesêno newe bîro. Qeyyûmanê dewleti hema hema heem cayan di tabelayê Kurdî cayanê merkezî ra hewaday; sembolê Kurdan ki beledîyeyê BDP/HDP taynî sşkan di viraşt bî, jew jew rakerdî, xirabe kerdî. Merdim şeno biperso, ma no tesadûf o? Wexta merdim bewno çiyo ki Mustafa Kemalî verê serdesteya xu vatbî û dima çiyo ki ardbi serê ma Kurdan bewno, bol akerde yo ki sîyasetê wurdna di jî înkar û îmha bîyo sereke wexta înan cayê serdesteya xu xurt kerdo. Eynî mentalîte û pêvajo merdim şeno kesanê zey Adnan Menderesî û Turgut Ozalî di jî bivîno.
Wexta merdim do sekero? Nameyê ”Tunceli” ki sera 1935in di bi hazireya qetlîamana Dersîmî ya ame, ma Kurdan rê bi zilm û zordesteya jû yo. Zeki yeno zanayeni dewleta zalim, hema hema nameyê heme sûk û dewanê ma jî virnayo. Zey heta nika, ney ra tepiya jî gereg ma Kurdî bi dostanê xû ya heme cayan di biwazê ki nameyê sûk û dewanê ma zeyi verî bê. Kişta bîn ra jî gereg ma tenya nameyê orîjînal ê sûk û dewanê xû bikar biyarê û ney di bol bi îsrar bê.
Bi no perspektîfa gereg ma bi heme rayana qerarê Beledîyeyê Dersîmî biparêzê, civerê heme babetê dekûdolabanê dewleti, na persi û persanê winayinan di paştîya Beledîyeyê Dersîmî bigîrî. Gereg ma ti wext xu vîra nêkerê û bi vengê berz vajê:
Dersîm ma yo, Ma Dersîm ê, Ne ma bê to benê, Ne ti bê ma benê…
/Nupel/
