Selîm Temoyê helbestkar û akademîsyen bi destpêka 2025 re, bi nivîsên xwe ve, ji 15 rojan carekî li Nûpelê ye. Nivîskar dê di her 1 û 15yê mehê de ji şibaka xwe ya li Nûpelê li ya rojane û ya dîrokî binêre.
Nûpela di 21ê Adara 2019an de dest bi weşanê kiriye bi rêhevalên nû re dest bi sala xwe ya 6. dike. Yek ji van navan Selîm Temo ye û ji 1ê Rêbendana/Çileya 2025an û pê ve dê ji 15 rojan carekî li Nûpelê be. Em wek Nûpel ji niha ve ji Temoyî re dibêjin tu bi xêr hatî û em bi meraq li benda nivîsên te yên bi Kurdî (Kurmancî) û Tirkî ne.
Jiyanname
Selîm Temoyê helbestkar, wergêr û akademîsyen di 27ê Nîsana 1972yan de li gundê Mêrînayê (Batman) ji dayîk bû. Dibistana seretayî li gundî, a navîn li Batmanê kuta kir. Bi destpêka xwendina Beşa Etnolojiyê ya Zankoya Enqereyê (1992-2000) re dest bi belavkirina berhemên wêjeyî kir. Master (2003; Wêjebûna Laşî di Helbesta Cemal Süreya de) û doktoraya xwe (2009; Dorhêl di Helbesta Tirkî de: 1859-1959) li Zankoya Bilkentê, di Beşa Zimanê Tirkî de bire serî. Di 2009an de li Zankoya Artukluyê ya Mêrdînê wekî asîstant profesor dest bi hîndekariyê kir û xebata damezirandina Beşa Ziman û Wêjeya Kurdî bi rê ve bir. Lê piştî ku Kurdî ji aliyê dewletê ve wekî “beş” nehate pejirandin, ji lijneya damezirandinê îstifa kir. Di 2011-2012yan de wekî “mamosteyê mêvan” li Navenda Lêkolînên Kurdî ya li Zankoya Exeterê (Brîtanya) xebitî. Di hin rojnameyan de heftane nivîs dinivîse (2013-2014, Radikal / 2017-2019 Duvar / 2019-2020, Xwebûn). Helbest û nivîsên wî bo Almanî, Azerî, Baskî, Danî, Ermenkî, Farisî, Flamanî, Frensî, Îngilîzî, Îtalî, Japonî, Kurdî (Kirmanckî, Kurmancî, Soranî), Spanyolî û Tirkî hatine wergerandin. Di meha pêşîn a 2017an de ji zanîngehê hat avêtin. Salekê li Zankoya Paul Valéry a li Montpellierya Fransayê xebitî (2020-2021). Li Parîsê dijî.
Berhemên wî yên çapkirî:
Helbest: Ah! Tamara (1995), Kırgın Nehirler Meseli (1996), Uğultular (2000), Sê Deng (2011), Keştiya Bayê (2016), Pûnga li Bajêr (2021), 112 Hesp û Xezelek (2023). Roman: Çiftlere Cinayet Dersleri (1998). Antolojî: Kürt Şiiri Antolojisi (du cild, 2007). Pirtûkên zarokan: Serê Şevê Çîrokek (12 pirtûk, 2006-2010; cildek 2019). Werger: Amidabad: Göç, Çocuk, Irmak (Vehênana Fawaz Husênî – 2004), Solgun Romans (Çîrokên Firat Cewerî – 2005), Abdalın Bir Günü (Romana Mehmed Uzunî – 2005), Sen (Romana Mehmed Uzunî – 2006), Yaşlı Rindin Ölümü (Romana Mehmed Uzunî-2006), Yitik Bir Aşkın Gölgesinde (Romana Mehmed Uzunî – 2006), Aşk Gibi Aydınlık Ölüm Gibi Karanlık (Romana Mehmed Uzunî – 2006), Mem ile Zîn (Mesnewiya Ehmedê Xanî – 2016), Kar ve Ateş (Helbestên Mueyed Teyibî – 2016). Lêkolîn û gotar: Türk Şiirinde Taşra (2011), Ruhun Bedeni (2014), Uzak Komşu: Kürt ve Türk Şiiri İlişkileri (2015), Horasan Kürtleri (2018), Cemal Süreya Şiirinde Beden ve Erotizm (2021). Tîpguhestin: Ne Ba Min Siwar Dike, Ne Ax Min Peya Dike (Helbestên Mueyed Teyîb, 2014). Edîtorî: Rojên Wêjeya Kurdî (Ligel Î. S. Aydoganî, 2011).
Xelatên ku wî wergirtine:
Xelata Yaşar Nabi Nayır a Helbestê, 1997
Xelata Halkevleriyê ya Romanê, 1998
Çirayên 2011an, Weqfa Hrant Dink
