Televîzyona dewletê ya Îranê jî mirina Xameneyî bi fermî piştrast kir.
🔴Televîzyona Dewletê ya Îranê bi fermî ragihand ku Rêberê Olî yê Îranê Ayetullah Alî Xameneyî di êrîşên DY-Îsraîlê de miriye. Piştî mirina Xameneyî, li Îranê 40 roj şîn û hefteyek jî betlaneya neteweyî hat ragihandin.
Televîzyona Dewletê ya Îranê, derdora saet 03.30’an de bi weşana zindî ya deqeya dawî mirina Xameneyî bi van gotinan ragihand:
“Rêberê me Hezretî Alî Xameneyî, di rêya bapîrê xwe yê mezin Hezretî Alî (ra) de çû û gihîşt meqamê herî bilind. Bi vexwarina şerbeta şehadetê gihîşt hizûra Rehmanî. hûrgulî ji aliyê Konseya Bilind a Ewlekariya Neteweyî ve hatin parvekirin.”
Trump: Ji bo gelê Îranê şansekî mezin e
Serokê DY’yê Donald Trump, di parvekirina li ser hesabê xwe yê Truth Social de derbarê Xameneyî de got: “Xameneyî yê ku yek ji mirovên herî xerab ên dîrokê bû, mir.”
Trump diyar kir ku Xameneyî nekarî ji “îstîxbarata DY’yê” û “pergalên şopandinê yên pêşketî” bireve û wiha got: “Bi hevkariya nêzîk a bi Îsraîlê re, tiştekî ku ew an rêberên din ên ligel wî hatine kuştin bikaribûna bikin tunebû.”
Serokê DY’yê bang li gelê Îranê jî kir û şiroveya “Ev şansê yekane û herî mezin e ku gelê Îranê welatê xwe paşve bistîne” kir.
Trump parast ku piraniya Artêşa Pasdarên Şoreşa Îranê û hêzên din ên ewlekariyê “êdî naxwazin şer bikin” û peyama “Niha dikarin parêzbendiyê bi dest bixin, lê paşê tenê mirin li benda wan e” parve kir.
Her wiha Trump da zanîn ku êrîşên DY û Îsraîlê dibe ku hinekî din jî bidomin û diyar kir ku êrîş dê “heta ku hewce bike” berdewam bikin.
