🔴Şaredariya Peyasê bi minasebeta 21’ê Sibatê Roja Zimanê Dayikê ya Cîhanî panelek li dar xist. Di panelê de hate destnîşankirin ku parastina ziman ne tenê li malê, divê di her qada jiyanê de bibe bingeha têkoşînê.
AMED – Pirtûkxaneya Berhemên Jinan a ku di bin banê Serkariya Polîtîkayên Jinan a Şaredariya Peyasê de xebatên xwe dimeşîne, bi minasebeta 21’ê Sibatê Roja Zimanê Dayikê ya Cîhanî panelek bi navê “Berxwedana Ziman û Rola Jinan” li dar xist. Panel bi beşdariya Hevşaredara Peyasê Bêrîvan Gulşen Sîncar, endamên meclîsê, nivîskar û gelek welatiyan bi rêve çû.
Moderatora panelê Fatma Guler Budak di destpêkê de bal kişand ser biryara UNESCO’yê û diyar kir ku kurdî di kategoriya zimanên di bin xetereyê de ye. Budak destnîşan kir ku tenê axaftina li malê têrê nake û wiha got:
“Divê em her qadê—dibistan, kreş, sazî, dezgeh û medyaya dîjîtal—veguherînin qadên perwerdehiya zimanê kurdî. Divê em zimanê xwe ji bin xetereyê derxînin û bikin zimanekî jîndar.”
Nivîskar û aktivîsta ziman Dîlan Guvenç, bal kişand ser bandora teknolojî û medyaya dîjîtal a li ser zimanên bindest. Guvenç anî ziman ku pergalên perwerdehiyê yên heyî dibin sedema asîmîlasyonê û mînaka kreşan da:
• Zarokên 5 salî gava diçin kreşên pergalê, zimanê wan diguhere.
• Têkoşîna siyasî bi tenê têrê nake; pêdivî bi xebatên sîstematîk û saziyên xurt heye.
Nivîskar Esra Sadikoglu jî li ser têkiliya jin û ziman rawestiya. Sadikoglu diyar kir ku parastina zimanê dayikê di zikê dayikê de dest pê dike û wiha axivî:
“Jinên kurd ev ziman heta îro anîne. Niha barê me ev e ku em vî zimanî bikin zimanê wêje, çand û jiyana rojane ya herî aktîf.”
Di panelê de Hevşaredar Bêrîvan Gulşen Sîncar û rêveberên Meclîsa Jinan jî amade bûn. Beşdaran bi pirs û nêrînên xwe beşdarî nûçeyê bûn û peyama “Ji bo ziman têkoşîneke stratejîk” dan. Panel piştî beşa pirs û bersivan bi dawî bû.
/Nûçe: Mordem Zel/
