🔴Parlamenterê DEM Partiyê Omer Ocalan hûrgiliyên hevdîtina xwe ya bi Abdullah Ocalan re parve kirin. Ocalan di hevdîtinê de bal kişand ser rûdanên li Îranê, pêvajoya çareseriyê ya li Tirkiyeyê û giringiya zimanê Kurdî.
Parlamenterê Partiya Demokrasî û Wekheviyê ya Gelan (DEM Partî) ê Rihayê Omer Ocalan, naveroka hevdîtina xwe ya 26’ê Sibatê ya bi Abdullah Ocalan re ji Ajansa Mezopotamyayê (MA) re ragihand. Hevdîtina ku li Girtîgeha Tîpa F ya Îmraliyê pêk hat, nêzîkî du demjimêran ajot û tê de gelek mijarên krîtîk ên rojevê hatin nirxandin.
“Em di Qonaxa Duyem a Midaxeleya Îranê de ne”
Abdullah Ocalan di nirxandina xwe ya li ser herêmê de bal kişand ser tevgerên leşkerî yên li Rojhilata Navîn û ev rewş wekî “qonaxa duyem a midaxeleya li Îranê” pênase kir. Ocalan bi bîr xist ku wî berê jî hişyarî dabû û got:
“Min gotibû Îraq çû, pêkhateya Sûriyeyê belav bû. Eger Îran xwe demokratîk neke, dê rûbirûyî midaxeleyê bibe. Niha cografyaya vê midaxeleyê berfireh bûye. Divê gel û saziyên me li hemberî vê rewşê tevdîrên xwe bistînin.”
Pêvajoya Çareseriyê û Gavên Pratîk
Li ser nîqaşên pêvajoya çareseriyê ya li Tirkiyeyê, Ocalan diyar kir ku her çend zemînek ji bo siyaseta demokratîk ava bûbe jî, leza pêvajoyê kêm e. Ocalan destnîşan kir ku êdî dema axaftinên teorîk derbas bûye û divê “gavên pratîk û polîtîkayên şênber” bên avêtin. Ocalan di vê mijarê de bang li dewletê û hemû aktorên siyasî kir.
Mafê Hêviyê û Statu
Ocalan bersiv da nîqaşên li ser “Mafê Hêviyê” û “Statuya” wî ku herî dawî ji aliyê Serokê MHP’yê Devlet Bahçelî ve hatibûn rojevê. Ocalan got:
“Statuya min statuya Kurdan e.”
“Mafê Hêviyê girîng e. Derketina min a ji vir, derketina gel e; derketina gel jî derketina min e.”
Birêvebiriyên Herêmî û Ahmet Turk
Di hevdîtinê de mijara qeyûman û Şaredariya Bajarê Mezin a Mêrdînê jî hat axaftin. Ocalan xwest ku astengiyên li pêşiya birêvebiriyên herêmî bên rakirin û destnîşan kir ku vegera Ahmet Turk a ser karê xwe xwedî wateyeke mezin e.
Hişyariya Zimanê Kurdî
Yek ji mijarên herî girîng ên hevdîtinê parastina zimanê dayîkê bû. Ocalan hişyarî da ku eger hêza siyasî û rêxistinkirî tune be, parastina çand û ziman jî ne pêkan e. Ocalan bi van gotinan girîngiya ziman anî ziman:
“Eger zihin perçe bûbe, ziman jî perçe bûye. Divê her kes di bin banê DEM Partiyê de xwedî li nirxên xwe derkeve.”
Di dawiya hevdîtinê de, Ocalan bi şêweyekî henekî ji Omer Ocalan re gotiye: “Kurdiya min ji Kurdiya we çêtir e.”
/Çavkanî: MA/
