DERSÎM – Kesîyeto namdar ê bawerîya Rayîrê Heqî û kedkarê kulturî, Mihemed Çelebî Dede ke Ocaxê Evdal Pîr Siltanî ra bi, “Aşma Xizirî” de şî heqîya xo. Meyîtê Mihemed Çelebî Dedeyî, ewro dewa Hacûlîye ya qezaya Pulemurî de bi şîn û girîyê heskerdoxanê ey ame erdnayene.
”Ez Çi Zana Belkî Xizir o”: Serborîya Verê Berî
Nivîskar Caner Canerîk ke çarçoveya projeya “Kamîlê Dersîmî” de bi 400 kesî de pêvînayîş kerdo, Mihemed Çelebî Dedeyî sey “merdimê de kêmvînayey” pênase keno. Canerîkî yew bîranîna xo ya dewa Hacûlîye de ke felsefeya kûr a Dedeyî nîşan dana, bi nê qiseyan pare kerde:
”Mi di rey şî verê berê ey, la qebûl nêkerd ke ez ey de hevpeyvîn bikî. Labelê êvareka asmebatî (Aşma Xizirî) de gava ez reyna şîyî verê berê ey, bi rîyê de geş ez dawet kerdî zerrî. Diba di saetan ma sohbet kerd, deyişî vatî. Mi pirsî kerd: ‘Seba çi nê rey te ez qebûl kerdî?’ Ey bi hênîyî û bi felsefeya bawerîya xo va: ‘Na Aşma Xizirî de, ez çi zana ka o ke ameyo berî kî yo… belkî Xizir bi xo yo.’“
Awêneya Civatî û Kedkarê Kulturî
Mihemed Çelebî Dede mîyanê civatê Dersîmî de sey pawitoxê ray û rismanê qedîman ameyêne naskerdene. Canerîkî dîyar kerd ke Dedeyî nêverda “toze bikewe serê rayîrê Xizirî” û bi nê hawayî deynê xo yê wijdanî û civakî ard ca.
Xebara merdene ey, reyna nîşan da ke naskerdişê nirxanê civakî û kedkarên kulturî verî ke bîyî vîndî, çend girîng o. Mihemed Çelebî Dede, aşma ke ci rê pîroz bîye de, axa dewa xo de bi xatirê xo waşt.
