Fermandarê Ewlehiya Navxweyî ya Hesekê Tuxgeneral Merwan el-Elî, ku serdana Nuredîn Îsa yê wekî Waliyê Hesekê hatiye erkdarkirin kir, daxuyand ku “Li Kobaniyê jiyan dê bi temamî vegere rewşa asayî.”
Fermandarê Ewlehiya Navxweyî yê Hesekê Tuxgeneral Merwan el-Elî serdana Waliyê nû yê Hesekê Nuredîn Îsa kir. Merwan el-Elî piştî hevdîtinê, tevî yek ji berpirsên Hêzên Ewlehiya Navxweyî ya Bakur û Rojhilatê Sûriyê (Asayîş) Siyamend Efrîn, daxuyanî da rojnamevanan.
Elî diyar kir ku rewşa Kobaniyê ya ku ev 19 roj in di bin dorpêçê de ye, dê di nêz de normal bibe. Merwan el-Elî got: “Meseleya Kobaniyê ligel Qamişlo û Hesekê wekî yekparçeyekê ye. Hêzên Asayîşê ketin herêma Şixûxê; pir nêz de hêzên ewlehiyê dê bikevin navenda bajarê Kobaniyê jî. Bi vekişîna yekîneyên leşkerî re, jiyan li bajêr dê bi temamî asayî bibe.”
Li gorî nûçeya İlke TVyê, Merwan el-Elî destnîşan kir ku Deriyê Sînor ê Semalka yê stratejîk, ku di navbera Herêma Kurdistanê û Bakur û Rojhilatê Sûriyê de ye, di bin “kontrola dewletê” de ye.
Elî bal kişand ser statuya deriyê sînor ku wekî “rewşeke taybet” pênase kir û got ku biryara dawî ya li ser statuya wê dê di encama hevdîtinên navbera rêveberiya Şamê û Fermandarê Giştî yê QSD’ê Mazlûm Ebdî de zelal bibe.
Elî hevdîtin wekî “gelekî pozîtîf” nirxand û ragihand ku lihevkirina ku di 29’ê Çileyê de di navbera hukûmeta Şamê û QSD’ê de pêk hatibû, derbasî qonaxa pêkanînê bûye. Merwan el-Elî diyar kir ku sê xalên pêşîn ên lihevkirinê (agirbest, avakirina xalên ewlehiyê û koordînasyon) bi serkeftî hatine pêkanîn.
Karbidestê Şamê bi bîr xist ku ew ji aliyê Ehmed Şara ve hatiye wezîfedarkirin û wiha domand:
“Me li ser gavên siberojê li hev kir. Em dest bi pêvajoya entegrasyona Balafirgeha Qamişlo û qadên petrolê yên Rimeylanê dikin. Ji bo rakirina aloziyê, hêzên leşkerî yên her du aliyan dê vekişin qişleyên xwe û cihê xwe ji yekîneyên ewlehiya navxweyî re bihêlin.”
Merwan el-Elî derbarê xelkê Efrîn, Serêkaniyê û Girê Spî yên ku ji ber şer malên xwe biterikandine de jî agahî dan û got ku hemû penaber dê bi rûmet vegere ser axa xwe. Elî anî ziman ku ji bo vê armancê, xebatên teknîkî û lojîstîkî dest pê kirine daku malên ku niha ji aliyê kesên din ve tên bikaranîn bên valakirin û radestî xwediyên wan ên resen bên kirin.
